家中拍的有趣相片

家中拍的有趣相片

有陣時,Elsa在屋企好得閒陪個仔玩,就會拿個相機出來,東拍一張,西拍一張,之後睇番自己拍的成果,都會對住D相笑.

同大家分享幾張有趣的峻峻相片:

1.坐車車,載cap,還要載黑超.

平時的峻峻係好討厭載帽,又吾肯載太陽眼鏡;雖然家中有兩部車,但係佢都吾多鐘意坐.不過,當他睇到電視機入面的卡通人物都係坐車車,載帽和黑超,他又立刻叫我幫佢載,仲好開心添,個樣真係笑死人,好似個......媽咪都吾識得形容啦!!

2.大家知吾知呢個細路仔做緊乜野呢?原來峻峻拿左舅父枝畫筆當鼓棍來打,將個雪櫃當成鼓,打得好粗魯,不過佢自己就樂在其中.媽咪覺得都幾危險,怕佢插親眼,所以平時好少比佢亂來.峻峻好鐘意將一樣物件當成另一樣物件來用,有時會將隻拖鞋當成電話,放在耳仔上面,同隻拖鞋傾計,一隻拖鞋落到峻峻的手上,就已經吾係一隻普通的拖鞋,而是一隻有電話功能的拖鞋.哈哈.

3.同爸爸一齊吃紫菜

峻峻每日都會吃一小包紫菜,已經成為了他不到缺少的零食之一,媽咪都吾知點解佢對紫菜情有獨中,平時比乜佢都吾食,睇佢細細粒就知.今日爸爸食緊紫菜的時候,峻峻又伸手話要,咁daddy梗係比個仔啦!睇下峻峻嘴邊一大片的黑色物體,原來係紫菜,真係偷食都吾識得抺嘴,為食貓.雖然峻峻同爸爸一樣都係單眼皮,但係對眼都好大,好精靈,個鼻同埋個嘴都好細.爸爸同個仔真係好似樣,daddy話個仔好似係佢的複製人.我聽到之後都吾知點回應才好!!

4.坐輪椅去街街

因為婆婆曾經中風,所以要坐輪椅.每次公公婆婆去街,都會推住輪椅.一出門口,峻峻就急不及待自己爬上輪椅,等婆婆.張椅好似好舒服喎!!

5.累了就坐低休息下

峻峻玩完玩具之後,很累,就坐在客廳和露台之間的門欄上,真係懶懶的表情,仲慢慢享受佢的下午茶(餅餅數塊),從來都沒有人教他坐在那裏,但他就是學會坐在那裏,可能高度合適,fit曬個PatPat仔.他還不肯除下帽子.吾知佢要戴到幾時呢??

大家如果想留言,又留吾到言,可以將留言send去我的e-mail那裏: ba30209@umac.mo

 

 

漁人碼頭一遊

漁人碼頭一遊

1.一起身,峻峻就爬去window,望出去,睇下街上的車車.佢一直以來都好鐘意望街景,望到吾肯走.

2.食飽早餐後,就坐巴士出發啦.睇下呢個小朋友,坐巴士都冇時定,用隻"金"手指,東指指,西指指,好八掛添!!

我睇書話:當一個BB識得用一隻手指指來指去的時候,爬行的階段已經結束,大腦的咁部分發育已經完成,進入另外一個階段.一般BB在一歲左右識得用手指指來指去,但峻峻就要一歲三個月才識,慢了點兒!!

3.終於到達漁人碼頭啦,一落車,竟然比峻峻發現媽咪個袋入面收埋左一枝益力多,大喊特喊話要,但係媽咪本來準備離開的時候才飲的,所以吾肯比峻峻飲.點知公公見到佢喊得咁慘,就比左峻峻飲,他立即停止喊,不用一分鐘就飲完整枝益力多.平時,峻峻每天都會飲一枝益力多,媽咪都吾知點解佢咁鐘意飲~吾知其他BB仔鐘吾鐘意飲呢?

4.經過一間毛公仔店,峻峻開心死啦.每個公仔,他都摸摸,抱抱,本來想跟他拍照留念,但不知為何不能在店裏拍照,那就替他在門口,隔著玻璃照了一張相.峻峻平時好鐘意攬住公仔吻一口,然後就丟在一旁,哈哈.

5.經過遊戲機店,峻峻立即露番兩手,希望第日吾好沈迷打機.因為佢爸爸好似個大細路咁,一得閒就機不離手.媽媽都冇眼睇.

6.峻峻學楂車,有板有眼架.吾會撞車架,大家可以放心.

因為媽媽好想今年暑假,可以坐私家車去黑沙游水,所以叫爸爸去學車,點知排期排到明年一月底,實在太失望啦!!如果搭巴士,可能要成粒鐘,咁不如吾去,巴士上空氣又吾好,又迫人.不過峻峻明天就要讀書啦,爸爸有私家車,就可以接送返學,比較方便.

7.母子合照.平時好少跟仔仔合照,因為媽媽負責拿相機,隨時影低峻峻的得意樣,所以少了好多同峻峻一齊拍照的機會.

8.峻峻好活潑,四處走來走去,又行上樓梯,又落樓梯.令公公好忙咁照顧住佢.可以睇下佢行樓梯的短片,佢一學識行之後,就好鐘意行樓梯,不過要人扶著,吾係的話會跌倒.

9.終於行到累,當然係訓覺覺豬.每次帶峻峻出街玩,佢都一定會訓覺.其實媽咪覺得漁人碼頭真係冇乜好玩,淨係得D建築物,D野食又貴到飛起,仲吾知新吾新鮮.一句講曬,漁人碼頭吸引吾到本地人!但係對於遊客,我就吾知啦!

10.所以,媽咪帶峻峻去左對面的新八佰伴,食mum mum,又便宜,又多選擇,峻峻就最鐘意中間的那碟飯.佢話好好味呀!!不過好味吾代表有益,可能好多味精,少食為宜.



11.結尾:漁人碼頭一遊,真係令到媽咪好累,而峻峻就好開心,每次出街峻峻都好開心,所以媽咪幾攰都會帶峻峻去多D街街,見識多D,聰明D.

叫"奶奶"

叫"奶奶"

首先請細心欣賞以下的短片,係關於峻峻學識叫"奶奶"的短片,由於峻峻由細個開始,媽咪已經教佢用BB手語去表逹佢想講的話,所以佢一直以來都係比較鐘意用手勢去同媽咪溝通,但由於前幾天峻媽生日,收到一本書(禮物),書中教媽咪如何誘發你的小孩說話,可以比一空的杯小朋友,然後誘發佢講"水",之後才倒水進杯中給他飲.我就立即試下,對峻峻講,你係咪想飲奶奶呀?如果係,要叫奶奶先有得飲喎,點知佢真係放棄左用手勢表逹,而大聲叫奶奶,之前佢係吾會用口講,淨係識得用手語表逹.峻峻發"奶奶"的音很準確,大家去片吧!!

回顧一下,峻峻的語言能力,未識講野時,多數都用手語表逹,但媽媽發現這樣會阻礙他的口語能力.他寧可用手勢,也不用口說,故媽咪轉了學習模式,改為引誘峻仔用口講話.因為手勢吾係人人識,除了媽咪之外,邊個知你想點喎!!但係語言就吾同,你一開口,全世界都明白你講緊乜,想點樣,應該比手語重要.

1.最早識講的字係:媽媽.我相信好多BB都一樣,媽咪咁重要,吾學識叫媽咪,梗係吾得啦!!峻峻半歲以後,開始識得叫媽媽,佢好識得呢個字的使用方法,有時我去廁所,將佢放在BB床,佢就會不斷叫媽媽,直至我出來抱他為止,他不肯比婆婆抱,他就是知道,只要叫媽媽,媽媽一定會來.可以睇下以下"叫媽媽"的短片.

2.第二個識講的字係:爸爸.在峻峻識得叫媽媽的一段時間後,爸爸聽見好生氣,點解我個仔吾識得叫爸爸架,咁之後,佢每次見到仔仔時,就話:叫聲爸爸先,一路行街街,一路同仔仔講,快D叫爸爸,隨時隨地都叫個仔講爸爸.終於在爸爸的強攻下,峻峻真係識得叫爸爸,當然開心死爸爸,但媽媽就有D吾開心,因為自從峻峻識得叫爸爸後,就好少叫媽媽.大家可以睇下"叫爸爸"的短片.不過可能太黑,聽下都好!!

3.第三個識講的字係:街街.在峻峻一歲之後,媽媽又要去返學啦!!將峻峻交比公公婆婆照顧,佢地好鐘意帶峻峻去街街,日日都去街街玩,咁講下講下,峻峻就識得叫街街.由於公公係返晚更,早上八時半放工回來,峻峻就立即對住公公話"去街街呀",佢真係識得連續咁講呢四個字,算係峻峻識講的第一句說話,但係公公話好累,吾想去,然後峻峻竟然訓左係個地上面扭計,大喊"去街街呀","去街街呀",點知比峻峻打動左公公,真係肯帶峻峻去街街.

4.第四個識講的字係:臭.可能媽咪平時成日講個"臭"字,會話臭腳,臭鞋,垃圾筒臭臭等,峻峻有時會用個鼻聞下只腳,然後笑著咁話臭,臭.有時又會指著個垃圾筒話臭,臭.好彩我吾講粗口,如果吾係,我諗峻峻都一定講粗口講得好叻.

5.第五個識講的字係:奶奶.之前都講左,就吾講太多.

6.其實峻峻仲識講好多野,例如識講"A"字,有時公公叫佢講ABC,佢就回應"A".有時佢玩緊架車仔,佢會笑笑口咁話"Car",不過吾識講個車字,淨係識講英文,可能在電視上學到的,吾係媽咪教的.佢仲識得講"馬馬",同埋"嫲嫲",可能同媽媽的音比較相似.有時我指著紅色問佢,係吾係"red"呀,佢就會大叫"叻叻",可能仲未發到呢個音,不過相似的音媽咪都接受架.佢平時仲會拿住個電話,自己同自己講野,好似真係傾緊電話咁,講一大堆BB話,無人聽得明,但係佢自己就好開心,可能係打電話問下爸爸放工味,幾時帶我去街街掛!!每當峻峻一發脾氣,就會好大聲好生氣咁講一大堆說話,好似講粗口咁,嚇親人地,哈哈,個個人見到都一定會笑佢.

語言的發展對一個小朋友來說真的很重要,但係我覺得手語對峻峻來說,變成口語的阻礙,所以我會暫停一下教峻峻手語,轉向誘發他用口說話.當然,每個BB的語言能力發展都吾一樣,正所謂一樣米養百樣人!!不能一概而論,只能選擇最合適的教法比仔仔.

 

第一只大牙

第一只大牙

(P.S. 睇吾睇到右下角的那只新長出來的大牙~)

峻峻在一歲三個月多D,就開始出第一只大牙,今天峻仔笑的時候,發現呢只牙仔長得好快,已經露出一大部份...

峻媽真係好開心,因為仔仔好快就可以同爸爸搶"雞比"食啦!!

回顧一下峻峻的出牙史:

1.五個月的第一個星期,開始出下面的一對門牙.比一般的半歲才出牙,早了一些.但整個月有嚴重的肚瀉現象,和不願食野,峻媽認為係由於出牙仔痛的關係.剛出牙時,發覺這對牙仔的位置有點歪,懷疑是否常咬玩具的原因,導致牙仔出得吾靚.不過整對牙出完後,呢個問題又好似消失左,對牙仔長得吾錯,又白又靚!!

2.九個月開始,同時出六只牙,上面出四只,下面出兩只.在預期之內,一般的BB都係呢個時候出牙.之前峻媽還以為發生了什麼問題,為什麼這麼久才出一對門牙.突然之間出六只牙仔,又嚇親峻媽,D書都冇話會同時出咁多只牙!!!可能因為大量出牙的關係,整個月什麼也不肯食(不是誇張),無論是固體,流質,或是奶,他都不肯飲.呢個月的身體發育就好像停止了,沒有增重,不過長高了兩CM.峻媽對仔仔的身體健康非常擔心,不過,當他的六只長都出完後,又開始肯食野,媽咪先放心D.

3.一歲三個月多D,第一只大牙終於衝線,露出來了.之前我見仔仔D牙肉腫得好嚴重,又連續多天不肯食野.同公公婆婆講,話峻峻可能要出大牙,但係老人家笑著話,邊有咁快出大牙,正常要歲半先出架.不過,事實勝於雄辯,比預期早了兩個月出大牙,其他三只大牙都就快出啦!!D牙肉都腫起.不肯食野的問題又出現.睇見仔仔越來越瘦,真係好擔心,如果佢好似其他BB咁一歲先出牙,可能佢依家係肥仔一個.

所以吾一定早出牙著數D,BB遲D出牙可能都有好處,就係吾怕咁快蛀牙!!!哈哈,點解我會咁講,因為每次我帶峻峻去公園時,佢一歲人仔時,八只牙仔已經好整齊,其他BB的家長經過,仲話:你個仔一定好快蛀牙,咁早出牙無乜用.(其實係別人的BB一歲時仲未出牙,妒忌才會這樣說).得到別人的提醒,峻媽做足功夫,就是每天刷牙(或者可以定時用濕棉花抺形),不吃朱古力和糖.這個方法非常有用,現在峻峻的牙仍然係又白又靚.

當BB已經出牙,又已經學爬學行時,做家長的要特別小心看管BB,因為BB可能會跌倒而撞丟牙仔,係一個好嚴重的問題,因為第二期的牙要六歲才長出,又或者令牙仔撞到缺了一角,也不是太好吧!!峻媽不是在吹水呀,是經驗之談,由於峻媽要返學,沒時間照顧兒子,公公又掛住自己睇電視,任由峻峻四處亂爬,結果係,當我放學回家時,發現峻仔其中一只牙仔缺了一小角,一定是撞掉了.傷心死媽咪,不過好在只是一小小角,沒有什麼人留意到(峻媽當然留意到,只有媽咪先會咁留意自己的孩子).

峻仔由於出牙的關係,經常不肯吃東西.相比起其他同齡的孩子,矮了幾吋,瘦了幾磅.媽咪真係好擔心仔仔出大牙又會吾肯食野.真係吾知點算好!!好想請教一下其他BLOG媽,點樣處理呢個問題??

其實好多人都會問峻媽,點解峻峻咁早出牙仔?

答案係,飲人奶.由於人奶成分對於BB比較易吸收,營養更豐富.相比起奶粉,雖然電視廣告話,奶粉同人奶成分相似,但這是真的嗎?當然是假的,奶粉跟人奶相差十萬八千里,試想想,奶粉是由牛奶提煉出來的,話明牛奶,當然係餵牛BB,而人奶,當然係餵人BB.怎麼可以用牛奶來餵人BB.雖然飲奶粉大的BB一般都比較大份,但書本上說這是假性健康,可參考一書,不過可能呢本書已經絕種,因為我在澳大圖書館借時,書本已經發黃,又就快爛.峻媽看過許多有關教養嬰兒的書籍,覺得"奶粉醜聞"這是一本相當不錯的書(其實我吾係好記得個書名,因為已經兩年前看的),書中講及雀巢,及其他大公司(其本上所有電視上賣奶粉廣告的公司)所出產的奶粉都係不適合嬰兒飲用,配方不正確,以及成分有偏差等問題.一句講曬,對BB最好的禮物,都係餵人奶.其實對於要返工的媽媽來說,就算只能餵出生的一個月,都已經很不錯.當然選擇吾餵人奶,都吾係媽媽的錯,因為我相信天下間的媽媽都係最愛自己的寶寶.

可能長篇大論左少少,因為峻媽一到星期五就會開心到暈左,太得閒啦!!星期六,日都是假期!!不用返學,又可以帶峻峻去街街,一家三口四處逛,真係好開心.其實我一直以來都很想在Blog上發表多些自己的意見,但係真係好忙,白天要返學,有時晚上又會出去上其他課程,放學以後專心教育峻峻,陪佢玩,陪佢笑,邊到有時間寫Blog,一到晚上,累到七彩,吾訓覺真係會死人架!!所以有時會很久才更新Blog,不好意思呢!!